Дустариз

Хабар кьуртIа зи гьалдикай дустари,
Шукур аллагь, хъсан я, лагь дустариз.
ТIалабирди чпивай зи къастари
Хийир-дуьа, игьсан я, лагь дустариз.

Хажалатар, хифетар зи дерин я,
Заз алахьай гуьлуьшан югъ серин я.
Вил атIудач дуьньядихъай - ширин я,
Айиб мийир, инсан я, лагь дустариз.

Жув хьайила эвел халкьдин арада,
Гила хелвет хажалатдин кьурада.
Дердерикай хабар кьадач чарада,
Дуьньядин гъам гьижран я, лагь дустариз.

Бенде авач гьал гьикI ятIа аквадай,
Дердиникай хабар кьуна рахадай,
Фугъарадин гьакъикъатда акьадай.
Бей-адалат дуван я, лагь дустариз.

Дустариз лагь: гъафил тахьуй ахвара,
Эхир нефес жезава, лагь, мукьвара.
Етим Эмин амач лугьуз, фугъара, -
Квез жериди са ван я, лагь дустариз.

Етим Эмин